Aparıcıya 4 İl Həbs və 5 Milyonluq Təzminat İddiası-FOTOLAR
Tanınmış aparıcı Vahe Kılıçarslanın səbəb olduğu avtomobil qəzası nəticəsində ağır xəsarət alan Olcay Emine Yıldırım aparıcıya qarşı 4.5 illik həbs cəzası və 5 milyon lirəlik təzminat iddiası qaldırıb. Qəza nəticəsində 67% əlillik dərəcəsi verilən Yıldırım, həyatı boyu ağır fəsadlarla yaşamaq məcburiyyətində qaldığını bildirib. Məhkəmə prosesi davam edir.
AsimanFərzəliyeva 
Türkiyəli tanınmış aparıcı və keçmiş maniken Vahe Kılıçarslanın iştirak etdiyi avtomobil qəzası böyük müzakirələrə səbəb olub. Hadisə 2023-cü ilin iyulunda Afyonkarahisarda baş verib. Kılıçarslanın idarə etdiyi avtomobilin digər bir maşınla toqquşması nəticəsində ən ağır yaralanan şəxs Olcay Emine Yıldırım olub.
Yıldırımın həkimlər tərəfindən müəyyən edilən 67%-lik əlillik dərəcəsi və yaşadığı davamlı fiziki və psixoloji problemlər səbəbindən Kılıçarslan barəsində 4.5 illik həbs cəzası və 5 milyon lirəlik təzminat tələb olunub. İddialara görə, qəza zamanı Kılıçarslan hadisə yerindən qaçıb, yaralılara isə ətrafdakı şəxslər yardım göstərib.
Olcay Emine Yıldırımın sözlərinə görə, qəza onun həyatını tamamilə dəyişib: "Həyatımın ən gözəl dövrü məhv oldu. Artıq ikinci uşaq sahibi olmaq xəyalımı unutmam lazım gəldi. Övladıma belə sarıla bilmirəm".
Məhkəmə prosesi davam edir və Kılıçarslanın günahkar olub-olmadığı barədə qərar gözlənilir.
