"Məni tanıdan və bacımı həyata qaytaran odur"

Əməkdar artist Mətanət İsgəndərli "Qonaqcanlı" verilişində həmkarı Elxan Şirinov haqqında ürəkdolusu danışıb. O, sənət yolunda ilk addımlarını atmasına Elxan Şirinovun dəstək verdiyini bildirib:

"Əməkdar artist Elxan Şirinovu niyə çox istəyirəm? Çünki o, mənim ilk dəfə əlimdən tutan insan olub. Azərbaycan Dövlət Televiziyasına ilk dəfə o məni aparıb və tanıtdırıb. Əli də yüngül oldu", – deyə sənətçi bildirib.

Mətanət İsgəndərli həmçinin bacısı Təranənin həyatda qalmasının da Elxan Şirinovun köməyi sayəsində mümkün olduğunu söyləyib:

"Bacım başından əməliyyat olunmuşdu, özümü itirmişdim. Bibimin qızı mənə Elxan Şirinova zəng etməyi məsləhət gördü. O, özü əməliyyat keçirmişdi və məni düzgün ünvana yönləndirdi. Bacımı ölümdən qurtardı".

Sənətçi Elxan Şirinova olan minnətdarlığını xüsusi vurğulayıb.