Varis Yolçuyevdən Azər Baxşəliyevlə bağlı təsirli paylaşım

Yazıçı Varis Yolçuyev bir neçə gün əvvəl vəfat edən aktyor Azər Baxşəliyevlə bağlı paylaşımı ilə diqqət çəkib. O, mərhum aktyorun bir filmdə canlandırdığı Ağsaqqal obrazının öz başdaşına baxdığı səhnənin fotosunu paylaşaraq yazıb:

"İnsanlar bəzən öz aqibətlərini özləri gətirir. Bu fotoda da bu müdrik kəlam təsdiqlənir. Sən bir filmdə öz yalançı başdaşını ziyarət elə və tezliklə bu başdaşı həqiqətə çevrilsin."

Sözügedən görüntü, məşhur komediya layihəsi olan "Bozbash Pictures"dən bir səhnəyə aiddir. Həmin səhnədə Azər Baxşəliyev canlandırdığı Ağsaqqal obrazı ilə qəbiristanlıqda rol alır. Səhnədə qəbir daşlarında İlkin Həsəni, Ramil Babayev, İlkin Misgərli və digər aktyorların şəkilləri yer alır. Ağsaqqal digər başdaşlarının yanından keçsə də, öz adının yazıldığı qəbrin qarşısında dayanır və başdaşına baxır.

Qeyd edək ki, Azər Baxşəliyev 3 iyul 1985-ci ildə anadan olub. O, "Bozbash Pictures"dəki Ağsaqqal və Əzəmət obrazları ilə tanınırdı. Uzun müddət böyrək çatışmazlığından əziyyət çəkən aktyor, yanvarın 2-də koma vəziyyətində xəstəxanaya yerləşdirilmişdi. Yanvarın 5-də isə dünyasını dəyişib və "Qurd qapısı" qəbiristanlığında dəfn edilib.