"Arzum valideynlərimin Ağdərəyə köç karvanında getməsidir"
Aparıcı Xoşqədəm Hidayətqızı valideynlərinin işğaldan azad edilmiş Ağdərəyə getməsini ən böyük arzusu kimi dilə gətirib. O, anasının oğlunun məzarını ziyarət etmək istədiyini və bu səbəbdən Allaha dualar etdiyini bildirib.
AsimanFərzəliyeva 
Ağdərənin kəndlərinə köç prosesinin başladığı xəbəri aparıcı Xoşqədəm Hidayətqızını duyğulandırıb. Verilişində bu barədə danışan aparıcı, valideynlərinin doğma yurdlarına qayıtmasını ən böyük arzusu kimi ifadə edib.
Xoşqədəm Hidayətqızı bildirib ki, anası hələ də oğlunun məzarını ziyarət edə bilməyib:
"Xəbəri oxuyanda göz yaşlarımı saxlaya bilmədim. Atam kəndimizi görüb, amma anam hələ də doğma torpağa gedə bilməyib. Onların köç karvanında Ağdərəyə getməsini arzulayıram. Hər gün Allaha dua edirəm ki, onlara ömür versin və bu arzu gerçəkləşsin. Anamın ən böyük istəyi oğlunun məzarını ziyarət etməkdir. Bir tərəfdən yurdumuza qayıtdığımıza sevinirəm, digər tərəfdən isə valideynlərimin bu anı görüb-görməyəcəyindən narahatam," – deyə aparıcı bildirib.
