Audrey Hepburnün 21 milyon dollara satılacaq villası - FOTOLAR

Dünyaca məşhur britaniyalı aktrisa Odri Hepbernin sağlığında yaşadığı "La Paisible" villası satışa çıxarılıb. Malikanənin satış qiyməti 19 milyon İsveçrə frankı (təxminən 21 milyon dollar) olaraq müəyyənləşdirilib.

Villanın yerləşdiyi İsveçrənin Toloşna kəndi, Cenevrə hava limanından təxminən 30 dəqiqəlik məsafədədir. 18-ci əsrə aid olan ev 1963-cü ildən 1993-cü ildə Hepbern vəfat edənə qədər ona məxsus olub.

2001-ci ildə Odri Hepbernin oğulları, analarına məxsus olan evi, "Europ Continents Services SA" şirkətinin keçmiş sədri Jan-Mark Bojolin və həyat yoldaşı Katarina Bojolinə satıblar.

Katarina Bojolin, malikanəni ilk gördükdə evə aşiq olduqlarını və əvvəlki sahibinin Hollivud əfsanəsi Odri Hepbern olmasının onlara əlavə xoşbəxtlik bəxş etdiyini bildirib. "Məktəb illərimdə yataq otağımda Hepbernin çoxlu fotoşəkilləri olub. O, mənim ən sevimli aktrisam idi", - deyə Katarina Bojolin xatırlayıb.

Malikanənin 3 mərtəbəsi və 40 hektar ərazisi var. 10,800 kvadrat fut sahəsi olan evin 12 yataq otağı, 8 vanna otağı və bir lift mövcuddur. Bu lüks villa, 30 ildən artıq bir müddətdə vəfat etsə də, Odri Hepbernin izlərini daşıyan, tarixi bir yer olaraq qalır.