Azərbaycanda rejissor film çəkmək üçün kredit götürüb

Əməkdar artist Sənubər İsgəndərli Azərbaycan kinosunun hazırkı vəziyyəti ilə bağlı fikir bildirib. Aktrisa əsas problemlərdən birinin maliyyə çatışmazlığı olduğunu deyib:

"Bizdə maliyyə baxımından arxayınlıq yoxdur, əksinə, sıxıntı var. Bu da həm keyfiyyətə, həm də texniki tərəflərə təsir edir. Azərbaycanda çox istedadlı aktyorlar və rejissorlar var, lakin maliyyə ən böyük problemdir".

Sənubər İsgəndərli kino sektorunda Türkiyənin maliyyə baxımından nümunəvi olduğunu söyləyib:

"Türkiyədə iri layihələrin həyata keçirilməsinin əsas səbəbi maliyyə təminatının mövcudluğudur. Bu, həm texniki səviyyəyə, həm də ümumi keyfiyyətə təsir edir. Azərbaycanda isə bu yaxınlarda çəkildiyim bir filmin rejissoru layihəni həyata keçirmək üçün kredit götürüb. Bu insanlar sənət üçün yanır, nəsə yaratmağa çalışırlar. Halbuki o rejissor həmin krediti şəxsi işləri üçün istifadə edə bilərdi. Amma o, sənət naminə bu addımı atıb".

Əməkdar artist səhvlərin normal olduğunu da əlavə edib və bunu inkişaf prosesinin bir hissəsi kimi qiymətləndirib.