Azərbaycanlı tanınmış bloqer xərçəng xəstəliyinə tutuldu

Azərbaycanda izləyiciləri tərəfindən sevilən bloqer Mehin Oktaylı (iconmekh) sağlamlığı ilə bağlı üzücü xəbər yayıb. Sosial media hesablarında milyonlarla izləyicisi olan gənc özünün xərçəng xəstəliyinə tutulduğunu açıqlayıb.

Mehin bildirib ki, bir müddət əvvəl fərqli bir nahiyədə yaranan şübhələr onu narahat etməyə başlayıb. İlkin mərhələdə bu vəziyyətin bədxassəli olduğu ehtimal edilib. Daha sonra İstanbulda müayinədən keçən bloqer xoş xəbər alıb və ciddi bir problemin olmadığı aydınlaşıb.

Lakin Bakıda təkrarlanan testlər nəticəsində onun boğazında xərçəng aşkarlanıb. Bu gözlənilməz xəbərə baxmayaraq Mehin ruhdan düşməyib. O, ailə üzvləri və yaxın dostlarının dəstəyi ilə bu çətin sınaq dövründən də üzüağ çıxacağına əminliyini ifadə edib.

Bloqer qarşıdakı dövrdə risksiz bir əməliyyatla xəstəliyi tamamilə məğlub edəcəyini vurğulayıb. Bununla yanaşı o, arzuladığı xaricdə yaşamaq planlarının bu vəziyyətə görə bir qədər ləngidiyini qeyd edib.

Gənc ulduz bu hadisələrin arxasında ilahi bir məqsəd olduğuna, hər şeyin onun xeyrini düşünən bir sistemin parçası olduğuna inandığını söyləyib. Mehin xəstəliklə mübarizədə yaxınlarının yanında olmasının və dəstəyinin əhəmiyyətini xüsusi vurğulayıb.

Bu xəbər bloqerin çoxsaylı pərəstişkarlarını kədərləndirməklə yanaşı, həm də ona sağlamlıq diləmələri üçün səfərbər edib. İzləyiciləri Mehini bu prosesdə tək qoymayacaqlarını və dualarının onunla olduğunu şərh bölməsində bildiriblər.

İnanırıq ki, Mehin Oktaylı bu sınaqdan da əvvəlki mübarizə əzmi və pozitivliyi ilə çıxacaq, yenidən pərəstişkarlarını sevindirəcək yeni layihələrlə qarşımıza çıxmağa davam edəcək.