Ben Afflekin evinin yerləşdiyi məhəllə külə döndü
ABŞ-da baş verən şiddətli yanğınlar bir çox məşhurun evlərini külə döndərib. Ben Afflek, keçmiş həyat yoldaşı Jennifer Garner və digər ulduzlar böyük itkilərlə üzləşib, amma sağ qalanlar arasında mübarizə və dəstək dolu anlar yaşanıb.
AsimanFərzəliyeva 
ABŞ-ın Los-Anceles şəhərində baş verən şiddətli yanğınlar zamanı bir çox məşhur ulduzun evləri məhv olub. Entoni Hopkins, Ceff Bridces və Paris Hilton da daxil olmaqla, çox sayda məşhur evini itirib. Lakin bəzi məşhurlar möcüzəvi şəkildə yanğından sağ çıxıblar.
Ben Afflek də bu yanğınlardan təsirlənənlər arasındadır. O, məhəlləsinin külə döndüyünü gözləri ilə izləyib. Sonrasında isə qızları ilə görüşərək onlara rahatlıq verməyə çalışıb. Keçmiş həyat yoldaşı Jennifer Garnerlə birlikdə evlərini boşaldan Ben Afflek, böyük qızı Vayoleti qucaqlayaraq ona təsəlli verib. Jennifer Garner isə öz evinin yanğından xilas olmasına baxmayaraq, dostlarından birini itirməyin kədərini yaşayır.
Eyni zamanda, Böyük Britaniya şahzadəsi Harri və Meqan Markl da bu yanğından zərər çəkənlər arasında yer alıb. Onlar malikanələrinin həyətini çətin vəziyyətdə olan qonşularına açaraq yardım təklif ediblər.
Los-Anceles yanğınsöndürmə xidmətinin açıqlamasına görə, 100 mindən çox insan hələ də təxliyə əmri altında qalıb və yanğın bölgələrinə qayıtmaq istəyənlərə xəbərdarlıq edilib ki, bu ərazilər çox təhlükəlidir.
