"Best Model of Azerbaijan 2024"ün qalibləri müəyyən olundu

"Best Model of Azerbaijan 2024" final mərhələsi dekabrın 7-də "Baku Crystal Hall"da keçirildi. Tədbir, Elxan Paşayev və "PAŞA EVENTS" tərəfindən təşkil olundu və böyük marağa səbəb oldu. Şouda müasir estradanın banisi Röya Ayxan, "Eurovision" təmsilçiləri Fəxri və İlkin Dövlətov, 2200 tamaşaçı və müxtəlif böyük partnyorlar iştirak edirdi. Modellərin və dizaynerlərin təqdimatları ilə zəngin olan gecə rəqs, musiqi və yarmarka ilə daha da möhtəşəmləşdi.

Final mərhələsinə 20 xanım və 20 bəy finalist qatıldı və gecənin sonunda münsiflər, auditoriya və idarə heyətinin verdiyi ballara əsasən qaliblər müəyyənləşdi. 1-ci yeri Səma İmanzadə və Rafət Əliyev qazandılar. 2-ci yeri Aysel İbrahimli və Murad Zəkiyev, 3-cü yeri isə Aişə Əliyeva və Ömər Paşayev əldə etdilər.

Qaliblərimiz 2024-cü ilin yanvar ayında İstanbulda keçiriləcək "Elite Model of the World" layihəsində ölkəmizi təmsil edəcəklər.