Fikrət Əliyevin 85 illik yubileyinə həsr olunmuş xatirə gecəsi keçirildi

Dekabrın 27-də Azərbaycan Dövlət Film Fondu və Azərbaycan Kinematoqrafçılar İttifaqının birgə təşkilatçılığı ilə tanınmış kinorejissor Fikrət Əliyevin 85 illik yubileyinə həsr olunmuş xatirə gecəsi keçirilib.

Tədbirin əsas hissəsi olaraq, sənətkarın həyat və yaradıcılığını əks etdirən bir fotosərginin açılışı olub. Sərgi, Fikrət Əliyevin Azərbaycan kinosundakı unikal rolunu və xüsusən də Abşeron mövzusuna olan dərin münasibətini nümayiş etdirib.

Azərbaycan Dövlət Film Fondunun direktoru, Əməkdar incəsənət xadimi Cəmil Quliyev tədbirdə çıxış edərək Fikrət Əliyevin yaradıcılığı haqqında ətraflı məlumat verib. O, rejissorun işlərinin Azərbaycan kinosunda mühüm yer tutduğunu vurğulayıb.

Tədbirdə Xalq artistləri Əbdül Mahmudov, Şamil Süleymanlı və Əməkdar artist Ruhəngiz Musəvi tanınmış kinorejissor haqqında xatirələrini paylaşaraq, onun sənətinə olan dərin hörmət və ehtiramlarını ifadə ediblər.

Xatirə gecəsinin sonunda “Aranfilm” studiyasının kinorejissor Fikrət Əliyevə həsr etdiyi “Məni izləyən müəmma” filmi nümayiş olunub. Filmin rejissoru Babək Abbaszadə olub.