"Günahkarları tapdın” - Kapitanın qızı

Azərbaycan Hava Yollarına məxsus J2-8243 nömrəli sərnişin təyyarəsinin Qazaxıstanda baş vermiş qəzasında həlak olan kapitan İqor Kşnyakinin qızı atasının qəhrəmanlığını qeyd edib. O, sosial şəbəkə hesabında atasına ithaf etdiyi yazısında onun həyatını itirərək başqalarının həyatını xilas etməyə çalışdığını vurğulayıb.

“Mənim qəhrəmanım olan ata, sən həmişə ürəyimdə olacaqsan. Onlarla insanın həyatını xilas etmək üçün özünü qurban verdin, günahkarları tapdın. Sən çox güclüsən və həmişə fəxr edəcəm ki, belə bir atam var. Çox şən idin, bizə hər şeyi verirdin və bizim xoşbəxt olmağımızı istəyirdin. Ən yaxşı atasan! Ümid edirəm ki, cənnətdə olacaqsan. Allah rəhmət eləsin,” – deyə o bildirib.

Dekabrın 25-də baş verən təyyarə qəzası nəticəsində 38 nəfər həyatını itirib, o cümlədən 26 Azərbaycan vətəndaşı da həlak olub. 17 nəfər isə yaralanıb. Yaralılardan 14 nəfərin vəziyyəti qənaətbəxşdir və onlar vətənə gətirilib. Həlak olanlardan 4-nün şəxsiyyəti müəyyən edilərək Azərbaycana gətirilib.