Günel Zeynalova Türkiyəli sənətçiləri şiddətlə qınadı: "Sizə Ayıb Olsun" - FOTO

Müğənni Günel Zeynalova, sosial media hesabında etdiyi paylaşımda, türkiyəli sənətçiləri Aktauda qəzaya uğrayan AZAL təyyarəsi ilə bağlı heç bir başsağlığı mesajı paylaşmadıqları üçün sərt şəkildə tənqid edib. O, bildirib ki, Türkiyədə baş verən zəlzələ və meşə yanğınları zamanı Azərbaycan hər zaman Türkiyənin yanında olub, bu səbəbdən də türkiyəli sənətçilərdən eyni duyarlılığı gözləyib.

Günel Zeynalova, özünün və izləyicilərinin gördüyü kadrlara əsaslanaraq, türkiyəli sənətçilərin Azərbaycanla bağlı faciəvi bir hadisə zamanı duyarsız qalmasının qəbul edilə bilməz olduğunu vurğulayıb. O, paylaşımında "Türkiyədə zəlzələ, meşə yanğınları zamanı onların yanında olub acılarını bölüşdük. Ümumiyyətlə Türkiyədə hər hansı faciə yaşandıqda biganə qalmadıq. Çünki dost pis gündə tanınar. Amma Instagram izləyicilərimdən olan türklərin Azərbaycanla bağlı baş verən hadisəyə dair paylaşım etdiyini görmədim. Ayıb olsun" deyərək narazılığını dilə gətirib.

Günel, həmçinin türk sənətçilərinə irad bildirərək "Heç vaxt bununla bağlı mənə nəsə deyilməyib. Ürəkdən kədərinizi hiss etmişəm, acınız acımızdır. Sənətçi dostlarım haradasınız?" sözlərini qeyd edib.

Qeyd edək ki, 2024-cü ilin dekabr ayında Bakı-Qroznı reysi üzrə uçan "Embraer 190" tipli sərnişin təyyarəsi qəza keçirib. Bu hadisə ilə əlaqədar yalnız bir neçə türk məşhuru başsağlığı verib.