"İmkanı olmayanlar yalnız bir uşaq dünyaya gətirsin, dövlət kömək etsin"

Müğənni Nura Suri sosial şəbəkədə qiymət artımı və cəmiyyətin gündəmindəki digər problemlərlə bağlı fikirlərini bölüşüb. Suri, hər gün yeni şadlıq sarayları, restoranlar və marketlər tikildiyini vurğulayaraq, cəmiyyətin yalnız yemək-içmək məsələsi ilə mi məşğul olduğunu soruşub. Bunun əvəzinə, fabriklər və zavodlar tikilməsinin, yerli istehsalın inkişaf etdirilməsinin vacibliyini qeyd edib. Öz brendlərini yaratmaq və istehsal sahələrində iş qurmaq ideyasını ortaya qoyub.

Suri, həmçinin gənclərin xaricdə təhsil almasının dövlət tərəfindən maliyyələşdirilməsinin cəmiyyətə fayda verəcəyini bildirib. O, teatr, rəqs, şahmat kimi sahələrdə uşaqların məşğuliyyətini artırmaq üçün müvafiq yerlərin açılmasının vacibliyini qeyd edib.

Müğənni, şou-biznesdə də monopoliya olduğunu, eyni müğənnilərin eyni tədbirlərdə iştirak etdiyini və toylarda eyni şablonların təkrarlanmasını tənqid edib. Həmçinin apteklərdəki keyfiyyətsiz dərmanlar və xaricdən gələn dərmanların əldə olunmasındakı çətinliklərə diqqət çəkib.

Suri, eyni zamanda, ev və torpaq almaq üçün icra hakimiyyətlərindən icazə alınmasının çətin və əziyyətli olduğunu vurğulayıb, qiymətlərin isə getdikcə artdığını qeyd edib.

O, cəmiyyətdəki kasıb təbəqənin dövlətin dəstəyinə ehtiyacı olduğunu bildirərək, bir qanun tətbiq edilməsini təklif edib: "İmkanı, evi, işi olmayanlar yalnız bir uşaq dünyaya gətirsin və dövlət o uşağın təhsilinə, sağlamlığına dəstək olsun."