"Meyxanaçı olmasaydım, saçım vaxtından tez ağarmazdı"

Meyxana ustası Orxan Lökbatanlı sənət həyatının gətirdiyi çətinliklərdən danışıb. O, Baku TV-nin "Qapqara" verilişində qonaq olarkən bildirib ki, meyxanaçılıq peşəsi əsəb, stres və yuxusuz gecələrlə doludur.

"Meyxanaçı olmasaydım, saçım vaxtından tez ağarmazdı. Burada böyük stres, həyəcan və yorğunluq var. Nə vaxtlı-vaxtında yatmaq, nə də normal qidalanmaq mümkün deyil. Bu da insanın erkən qocalmasına səbəb olur," - deyə sənətçi vurğulayıb.

Dostluq münasibətlərinə toxunan Orxan Lökbatanlı mərhum meyxanaçı Vüqar Biləcəri ilə aralarındakı dərin bağdan da danışıb:

"Vüqarla elə mövzularda dərdləşirdim ki, onları heç kimlə bölüşə bilməzdim. Məni yalnız o başa düşürdü. İnsanlar onu hökmran bir meyxanaçı kimi tanıyıb, amma onunla saatlarla dərdləşdiyimiz, başımızı bir-birimizə söykəyib ağladığımız günlər olub. Vüqarın ürəyi uşaq ürəyi kimi saf idi," - deyə sənətçi bildirib.