Müğənni Kərim toyda dalaşdığı şəxslərlə barışdı

Müğənni Kərim Abbasov ötən ilin sentyabr ayında bir məclisdə fonoqram oxuduğu üçün dalaşdığı şəxslərlə barışıb. O, ATV-də yayımlanan verilişdə bu barədə danışıb: "O söhbət bağlandı, barışıq oldu. Gəldilər və danışdıq, razılıq əldə olundu. Elə kəlmələr var ki, onlar mənə yaraşmır. Dava ola bilər, bir nəfərə təpik, birinə də yumruq dəyə bilər. Amma döyülmək məsələsi olmayıb və ola da bilməz," – deyə Kərim bildirib.

Qeyd edək ki, ifaçı ötən il verilişlərdən birində həmin şəxsləri bağışlamağa hazır olduğunu bildirmişdi. O, bunun səbəbini belə izah etmişdi: "Baxmayaraq ki, toyda istifadə etdiyim qulaq cihazı və səs aparatım qırılıb, paltarlarım cırılıb, barmağım sınıb, amma onların həbs olunmasını istəmirəm. Çünki hərəsinə bir cəza verəcəklər, onların balalarının gözünü yolda qoymaq istəmirəm".