Xəyyamın Sağalması Üçün Yardım İstədi - Video
Meyxanaçı Namiq Qaraçuxurlu ağır səhhət problemi yaşayan həmkarı Xəyyam Əhmədlini ziyarət edib. O, Xəyyamın sağalması üçün ciddi maddi dəstəyə ehtiyac olduğunu vurğulayaraq izləyicilərinə müraciət edib.
AsimanFərzəliyeva 
Məşhur meyxanaçı Namiq Qaraçuxurlu hazırda ağır səhhət problemi ilə mübarizə aparan meyxanaçı Xəyyam Əhmədlini evində ziyarət edib. Səfər zamanı Namiq, həmkarının sağalması üçün cəmiyyətin köməyinə ehtiyac olduğunu bildirib. "Bir çox məşhur mahnıların müəllifi Xəyyamdır. Onunla bağlı paylaşım etdim, bəzi dostlar dəstək oldu. Amma daha çox yardıma ehtiyac var. Kart nömrəsi paylaşacağam, imkanı olanlar kömək etsin," - deyə Namiq sosial media hesabında qeyd edib. Məlumat üçün bildirək ki, Xəyyam Əhmədlinin ürəyində ciddi problem mövcuddur. Onun qarnında maye toplanması baş verib və ürəyində əməliyyat aparılması mümkün deyil. Sağalması üçün ona qiyməti 130 min dollar olan xüsusi aparat lazımdır. Xəyyam Əhmədli 2018-ci ildə ürəyindən anju əməliyyatı keçirib. Humanitar yardımın vacibliyi barədə bu paylaşım geniş dəstək qazanıb və izləyicilər arasında böyük rezonans doğurub.
