Ağadadaş Ağayev: "Doğruları danışsa, üzr istəsə, niyə də bağışlamayım?"

Xalq artisti Ağadadaş Ağayev, onu döyən mühafizəçi ilə bağlı mövqeyini açıqlayıb. Müğənni, qarşı tərəflə barışmaq məsələsinin yalnız həmin şəxsin davranış tərzindən asılı olduğunu qeyd edib. Ağadadaş Ağayev bildirib ki, mühafizəçi yalnız üzr istədiyi təqdirdə bağışlanacaq:

"Bu məsələ mənim üçün sadəcə şəxsi məsələ deyil. O adamın üzr istəməsi, həm də xalqımdan üzr istəməsi vacibdir. Mənim ailəmin hörmətli kökləri var, əcdadım Mirzə baba bəy olub və həmişə hamı onun yanına barışıq üçün müraciət edərdi. Allah bağışlayandır, amma insan doğruları danışmalı və üzr istəməlidir. Hər şey ola bilər."

Qeyd edək ki, iyulun 23-də Binəqədi rayonunda baş verən insidentdə Ağadadaş Ağayevlə "MedEra Hospital"ın mühafizəçisi Nurəddin Cəlilov arasında mübahisə yaranıb. Ağadadaş Ağayev mühafizəçiyə balta atıb, bu zaman balta klinikada çalışan Nəzakət Paşayevaya dəyib və ona xəsarət yetirib. Nəticədə mühafizəçi Ağadadaş Ağayevi döyüb.

Faktla bağlı cinayət işi başlanıb və Ağadadaş Ağayev Cinayət Məcəlləsinin 221.3-cü maddəsi ilə təqsirli bilinib. Məhkəmə baxışı noyabrın 28-də keçiriləcək.