Klarnet ifaçısı Hüseyn Məhəmmədoğlu "Tarixin bir günü" verilişində çıxışı zamanı televiziya reytinqləri ilə bağlı sərt fikirlər səsləndirib.
Musiqiçi verilişlərdə qonaq seçimlərinin və reytinq hesablamalarının obyektiv olmadığını bildirib:
"Onsuz da mən danışmaqla nəyisə dəyişən deyiləm. Hər kəs istədiyi müğənnini verilişinə dəvət edəcək. Mən sizi də başa düşürəm, gündəlik proqramları doldurmaq çətindir. Buna görə də artıq heç kimi tənqid etməməyə qərar vermişəm.
Deyirlər ki, xalqın gözü tərəzidir. Amma bu tərəzini reytinqlərlə ölçürsünüzsə, bu, başqa məsələdir. Siz reytinqi cəmi 950 nəfərin evində quraşdırılmış cihazlarla hesablayırsınız. Əgər Azərbaycan musiqisinə bu sayda insan qiymət verirsə, bu, biabırçılıqdır! Lap 1000 və ya 5000 nəfər olsun, onlar bizə qulaq asmırlar, musiqidən bixəbər insanlardır".
