"Bu, mədəni yolçuluğun bir növüdür"

Aparıcı Tarix Əliyev (Tolik) Novruz bayramında papaqatma ənənəsinin dəyişməsinə sosial şəbəkədə reaksiya verib. O, insanların bayram təbriki əvəzinə, bank kartı şəkilləri paylaşaraq pul istəməsini tənqid edib.

"İki gündür ki, Novruz bayramı ilə bağlı təbriklərdən çox, bank kartı şəkilləri paylaşılır. Üzərində papaq və qapı döymə səsi olan kartlar atırlar. Bu nə deməkdir? Mədəni şəkildə pul istəmək, yoxsa birbaşa "mənə pul göndərin" deməkdir?" – deyə Tolik bildirib.

O, bu yeni tendensiyanı anlamadığını və bunu papaqatma adətinin mahiyyətinə uyğun görmədiyini vurğulayıb:

"Bizim gördüyümüz ənənədə papağın içinə şirniyyat – qoğal, şəkərbura, paxlava və konfet qoyulardı. İndi isə insanlar papağa pul qoymağı normal qəbul edirlər. Əgər pul istəyirsinizsə, bunu açıq şəkildə deyin. Bu, artıq mədəni yolçuluğun bir növünə çevrilib" – deyə aparıcı fikrini tamamlayıb.