Elariz Məmmədoğlunun kürəkəni özünü təqsirləndirmir

Elariz Məmmədoğlunun kürəkəni Nizami Alışan, valyuta alqı-satqısı etməklə gəlir əldə etməyə çalışan şəxsləri aldatmaqla təqsirli bilinib. Onun barəsində Bakı Ağır Cinayətlər Məhkəməsində keçirilən prosesdə, Alışan özünü təqsirli bilmədiyini qeyd edib. Nizami Alışan "İnvestAZ" investisiya şirkətinin adından istifadə edərək zərərçəkənlərə yalan vədlər verib və böyük məbləğdə pul alıb.

Alışan, Babək Məmmədzadədən 1 milyon 300 min, Zeynal Usubovdan 945 min və Yadigar İsrafilovdan isə 200 min dollar pul alıb. Zərərçəkənlərə dəyən ümumi ziyan isə 2 milyon 445 min dollar olub.

Təqsirləndirilən şəxsin vəkili, Alışanın müvafiq mobil operatordan mobil məlumatların təqdim edilməsini və "İnvestAZ" rəhbərliyinin şahid qismində dindirilməsini tələb edib. Məhkəmənin növbəti iclası fevralın 10-na təyin edilib.

Qeyd edək ki, Nizami Alışan müğənni Elariz Məmmədoğlunun kürəkəni, AzTV-nin keçmiş sədri Arif Alışanovun isə qardaşı oğludur.