İrina Şeyk qızı ilə səmimi görüntülərini paylaşdı – FOTO

Məşhur rusiyalı supermodel İrina Şeyk yeddi yaşlı qızı Lea ilə birgə paylaşdığı foto ilə izləyicilərinin diqqətini cəlb edib.

39 yaşlı model bu fotonu şəxsi sosial media hesabında yayımlayıb. Kadrlarda İrina qızı ilə birlikdə divanda oturub. Kiçik Lea anasının başına ayaqlarını qoyaraq poza verib. Supermodel çiçək naxışlı açıq rəngli pijama geyinib, saçları açıq olub və üzündə makiyaj olmayıb.

"Ana olmaq elə bir şeydir ki..." – deyə İrina paylaşımına qeyri-adi bir şərh əlavə edib.

Qeyd edək ki, İrina Şeyk qızı Leanı 2017-ci ilin martında məşhur Hollivud aktyoru Bredli Kuperdən dünyaya gətirib. Cütlük 2019-cu ildə ayrılmalarına baxmayaraq, məhkəmədə ortaq qəyyumluq barədə razılığa gəlib və qızları ilə birgə ictimaiyyət qarşısına çıxmağa davam edirlər.