Jay-Z və Diddi-yə qarşı cinsi zorakılıq iddiasında GÖZLƏNİLMƏZ DƏYİŞİKLİK

Məşhur reperlər Jay-Z (əsl adı – Şon Kori Karter) və Diddi (əsl adı – Şon Kombs) barədə açılan cinsi zorakılıq işində gözlənilməz dəyişiklik olub. 13 yaşında hip-hop ulduzları tərəfindən cinsi zorakılığa məruz qaldığını iddia edən qadın şikayətini könüllü olaraq geri götürüb.

Məlumata görə, tərəflər arasında heç bir razılaşma əldə olunmayıb. Bu isə ittihamların əsassız olduğunu göstərir.

Qeyd edək ki, qadın 2000-ci ildə "MTV Video Music Awards" mükafatlandırma mərasimindən sonra baş verən hadisədə zorakılığa məruz qaldığını iddia etmişdi. O, özünü pis hiss etdiyi üçün dincəlmək məqsədilə yataq otağına getdiyini, orada Jay-Z və Diddi tərəfindən cinsi xarakterli hərəkətlərə məruz qaldığını söyləmişdi.

Lakin qadının atası həmin gün qızını götürdüyünü xatırlamadığını bildirdikdən sonra iddia ilə bağlı şübhələr yaranmışdı. Bu səbəbdən qadın məşhur reperlərə qarşı irəli sürdüyü şikayəti geri götürmək qərarına gəlib.

Jay-Z vəziyyətə münasibət bildirərək, iddianın əvvəldən əsassız olduğunu və heç bir nəticə vermədiyini qeyd edib.