"Məni məqsədli şəkildə hədəf alıblar"

Türkiyənin İstanbul şəhərində qanunsuz mərc oyunları ilə bağlı aparılan istintaq çərçivəsində barəsində 5 il 3 ay həbs cəzası tələb edilən iş adamı və televiziya prodüseri Acun Ilıcalı ittihamlara münasibət bildirib.

Türk mediasının yaydığı məlumata görə, Ilıcalı TV proqramlarının birində öz günahsızlığını vurğulayaraq məsələnin məqsədli şəkildə böyüdüldüyünü qeyd edib. O, yayımladığı oyunlarda stadionlardakı reklamların avtomatik olaraq göründüyünü və bunun üzərində heç bir nəzarətinin olmadığını bildirib:

"Mən sadəcə olaraq UEFA-dan matç almışam. Stadionda hansı reklamların olması mənim səlahiyyətimdə deyil. Bu məsələ məhkəməyə qədər gəldi, amma bu, hələ hadisənin cinayət olduğunu sübut etmir. Başqa kanallar da eyni çətinliklə üzləşib."

Xatırladaq ki, ittiham aktına əsasən, Acun Ilıcalının sahibi olduğu "TV8" və EXXEN platformalarında yayımlanan futbol matçları zamanı qanunsuz mərc saytlarının reklam olunduğu iddia edilir. İşlə bağlı ümumilikdə səkkiz nəfər təqsirləndirilir. Ilıcalı iyul ayında məhkəmə qarşısına çıxacaq.