Mərhum Əməkdar artist Tünzalə Əliyevanın həyat yoldaşı Röyal, onun xatirəsi ilə bağlı dərin duyğularını bölüşüb. Sosial media paylaşımında Röyal, Tünzalənin yoxluğunun yaratdığı boşluğu, telefon zəngləri ilə doldurmağa çalışdığını bildirib. Röyalın sözlərinə görə, həyat yoldaşının səsi və onunla bağlı xatirələr, hələ də təsəlli mənbəyi olaraq qalır. Röyal həmçinin, qızına Tünzalənin adını şərəflə daşıyan bir gələcək vəd etdiyini vurğulayıb.
"699 gündür ki, o yoxdur. Artıq xatirələr də yavaş-yavaş məni tərk edir. Əvvəldən yaddaşım güclü deyildi, indi isə demək olar ki, heç nə qalmayıb. Bəzən onun telefonundan özümə zəng edirəm. Bu, az da olsa mənə təsəlli verir. Hər dəfə səsini eşidəndə, dediyi "eşqim" sözləri ilə həmin anları yenidən yaşayıram," - deyə mərhum Əməkdar artist Tünzalə Əliyevanın həyat yoldaşı Röyal bildirib.
Röyalın sözlərinə görə, Tünzalənin yoxluğu onun həyatını kökündən dəyişib: "Qəribədir ki, bəziləri sağ olan həyat yoldaşından ayrılmaq qərarı alır, mən isə dünyada olmayan həyat yoldaşıma qovuşacağım günün xəyalını qururam. Allah şahiddir ki, o dünyadan köçəndən bəri ona xəyanət etməmişəm. Qızımıza onun adını şərəflə daşıyan bir həyat bəxş edəcəyəm. O, başı uca böyüyəcək."
Bu paylaşım Röyalın mərhum həyat yoldaşı Tünzaləyə olan sonsuz sevgisini və bağlılığını bir daha nümayiş etdirir.
AsimanFərzəliyeva 
