Məhkəmədə Zaur Baxşəliyevə Xəbərdarlıq Tələb Edildi
Bakıda baş vermiş qətl hadisəsi ilə bağlı məhkəmə prosesi zamanı "Bizimləsən" verilişi və aparıcısı Zaur Baxşəliyev müzakirə mövzusu olub. Təqsirləndirilən şəxsin vəkili aparıcının istintaq materiallarını efirdə səsləndirdiyini iddia edərək məhkəmədən xəbərdarlıq edilməsini xahiş edib. Zərərçəkmiş tərəf isə iştirakını müdafiə edib.
AsimanFərzəliyeva 
Bakının Qaradağ rayonunda 2006-cı il təvəllüdlü Məzahir Bayramovun qətl törətməsi ilə bağlı məhkəmə prosesi davam edir. Təqsirləndirilən şəxsin vəkili məhkəməyə təqdim etdiyi vəsatətdə Zaur Baxşəliyevin aparıcısı olduğu "Bizimləsən" verilişində istintaq materiallarının efirdə səsləndirildiyini iddia edib və aparıcıya xəbərdarlıq edilməsini tələb edib. Zərərçəkmiş İlham Haqverdiyevin anası Xaliqə Əliyeva isə verilişdə iştirak etməyə davam edəcəyini bildirib və vəkilin vəsatətinin rədd olunmasını istəyib. Dövlət ittihamçısı da vəsatətin təmin edilməməsini dəstəkləyib. Hakimlər heyəti vəsatəti qismən təmin edərək Xaliqə Əliyevaya xəbərdarlıq edib. Prosesdə qətl hadisəsinin detallarına da yer verilib. 2024-cü ilin mart ayında Qaradağ rayonunda İlham Haqverdiyevin şəxsi mübahisə zəminində kəsici-deşici alətlə öldürülməsi faktı üzrə Məzahir Bayramova Cinayət Məcəlləsinin 120.2.2-ci maddəsi ilə ittiham irəli sürülüb. Məhkəmə prosesi dekabrın 6-da davam edəcək.
