Aygün Bayramova: "Siyavuş Kərimi hər zaman yaradıcı şəxsiyyət olaraq qalacaqdır!"

Xalq artisti Aygün Bayramova, Azərbaycan Milli Konservatoriyasının rektoru vəzifəsindən azad edilən Siyavuş Kərimi ilə bağlı danışıb. O, "Zaurla Günaydın" verilişində Kəriminin gedişini təntənəli şəkildə qeyd etdiyini bildirib və onun çox gözəl bir söz söylədiyini xatırladıb. Bayramova qeyd edib ki, Siyavuş Kərimi "Mən yenə də sizinləyəm" deyərək hər zaman yaradıcı şəxsiyyət olaraq qalacağını vurğulayıb.

Aygün Bayramova həmçinin yeni rektor Kamilə Dadaşzadəni təbrik edib və ona bu məsuliyyətli və çətin işdə uğurlar arzulayıb. O, Ulu öndər Heydər Əliyevin Milli Konservatoriya yaranarkən Siyavuş Kərimiyə "get yarat" sözlərini xatırladaraq, onun bu missiyanı layiqincə yerinə yetirdiyini qeyd edib.

Ötən gün Prezident İlham Əliyevin imzaladığı Sərəncama əsasən, Siyavuş Kərimi Azərbaycan Milli Konservatoriyasının rektoru vəzifəsindən azad edilib. Dövlət başçısının digər Sərəncamı ilə Kamilə Hüseyn qızı Dadaşzadə yeni rektor təyin edilib. Siyavuş Kərimi 2001-ci ildən bu vəzifədə çalışırdı.