Elton Hüseynəliyevin Möhtəşəm Konserti-FOTOLAR
Mükəmməl sənət, ecazkar musiqilər və canlı ifalarla Elton Hüseynəliyev Heydər Əliyev Sarayında unudulmaz bir gecə yaşatdı. Müğənni, "Nəğməli Dünyam" adlı solo konsertində iki saatlıq canlı ifalarla dinləyicilərinin qəlbini oxşadı və 20 ildən sonra ən böyük arzusunu reallaşdırdı.
AsimanFərzəliyeva 
Çoxdan gözlənilən əsl sənət gecəsi baş tutdu. Əməkdar artist, tanınmış müğənni Elton Hüseynəliyev Heydər Əliyev Sarayında ötən gün sevənlərinə əsl musiqi zövqü yaşatdı. "Nəğməli dünyam" solo konsert proqramında müğənni fonoqramsız, bekvokalsız iki saatdan artıq canlı ifaları ilə dinləyicilərinin qəlbini oxşadı. Bu gecə, musiqinin ruhu ilə dolu anlar, efirləri zəbt edən bayağı ifaların əksinə, mükəmməl sənətin və səsin qaldığını bir daha sübut etdi.
Konsertdə tanınmış sənət adamları, ictimai xadimlər və Eltonsevənlər iştirak etdi. Müğənni konsertdən əvvəl mətbuat konfransı keçirib və jurnalistlərin suallarını cavablandırıb. O, uzun illərdir reallaşdırmaq istədiyi ən böyük arzusunu Heydər Əliyev Sarayında solo konsert verməklə həyata keçirdiyini bildirib: "20 ildən sonra arzum reallaşdı. Heydər Əliyev Sarayında solo konsert vermək ən böyük arzum idi. Bu gün bu arzumu reallaşdırdım. Ən böyük arzularımdan biri də Şuşada konsert verməkdir. Gün o gün olsun, bu arzum da həyata keçsin."
Bu konsert bir daha göstərdi ki, sənət dünyasında yalnız belə səs və ifalar qalacaq.
