"Evli olduğum o dörd ilə heyfim gəlir..."

Əməkdar artist, Akademik Milli Dram Teatrının tanınmış aktrisası Mehriban Xanlarova kulis.az-a müsahibəsində teatr fəaliyyəti, ailəsi və şəxsi həyatı barədə səmimi açıqlamalar verib.

O, uzun illər "Manqurt" tamaşasında Nayman Ana obrazını canlandırdığını və bu roluna görə Qırğızıstanda ən yaxşı aktrisa seçildiyini bildirib. Hər tamaşadan əvvəl həyəcan keçirdiyini deyən aktrisa səhnədə tamaşaçının alqışlarının onun üçün ən böyük mükafat olduğunu vurğulayıb.

Mehriban Xanlarova ailəsindən də danışıb. Aktrisa kasıb bir fəhlə ailəsində doğulduğunu, atasının və anasının lal-kar olduğunu qeyd edib. O, uşaqlıqda çətinliklər yaşadığını, lakin Zeynəb Xanlarovanın himayəsində böyüməsinin onun həyatına böyük təsir etdiyini bildirib.

Aktyorluq karyerasına təsadüfən başladığını deyən Mehriban Xanlarova, "Sahilsiz gecə" filmindəki Zibeydə obrazı ilə tamaşaçının yaddaşına həkk olunduğunu bildirib. O, bu roldan sonra onu döydükləri haqda yayılan xəbərlərin yalan olduğunu, əksinə, tamaşaçı rəğbətinin onu bu sənətə bağladığını vurğulayıb.

Müsahibədə aktrisa televiziya proqramlarında ekspert kimi iştirakına da toxunub. O, efirdə haqqı deməkdən çəkinmədiyini və bəzən bu səbəbdən birmənalı qarşılanmadığını bildirib.

Şəxsi həyatına gəldikdə, Mehriban Xanlarova evliliklə bağlı çətin təcrübələr yaşadığını etiraf edib: "Evli olduğum o dörd ilə heyfim gəlir..." sözləri ilə keçmiş evliliyindən peşman olduğunu ifadə edib.

Aktrisa hazırda sənətini davam etdirdiyini və yalnız ona layiq olan rolları qəbul etdiyini bildirib.