İranlı müğənni Parasta Əhmədi, 11 dekabrda YouTube kanalında canlı yayımlanan yarım saatlıq hicabsız konserti ilə gündəmə gəlib. Konsertin yayımlandığı müddətdə 74 min insan onu izləyib. Müğənni konsertə başlamazdan əvvəl bildirib ki, mahnı oxumaq və xalqına sevgi bəsləmək onun hüququdur.
Səlahiyyətlilər, konsertin hüquqi icazəyə malik olmadığını və mədəniyyətə uyğun olmadığını bildirərək, müğənnini saxlayıblar. Təhlükəsizlik işçiləri Əhmədinin evinə basqın edərək onu dindirilmək üçün Tehran prokurorluğuna aparıblar. Hicabsız ictimai yerlərdə görünmək İranda qadınlara qadağan olunduğu üçün, Parasta Əhmədi haqqında cinayət işi açılıb. Hazırda müğənninin harada olduğu məlum deyil.
