Miri Yusifin prodüseri şantaja məruz qaldı

Xalq artisti Miri Yusifin prodüseri və tanınmış teleaparıcı Emin Əfəndi şantajla üzləşdiyini açıqlayıb. O, yanvarın 19-da belə bir xoşagəlməz hadisənin baş verdiyini təsdiqləyib və hüquq-mühafizə orqanlarına müraciət etdiyini bildirib.

“Məsələnin hüquqi müstəvidə həlli üçün lazımi addımlar atmışıq və bu hadisə ilə bağlı heç bir maliyyə ödənişi etməmişik. Təəssüf ki, son zamanlar bu cür kibercinayətlər geniş yayılıb və bir çox insan belə vəziyyətlə qarşılaşa bilər. Bu isə ölkəmizdə daha ciddi maarifləndirmə işlərinə ehtiyac olduğunu göstərir,” – deyə Emin Əfəndi qeyd edib.

Prodüser, hüquq-mühafizə orqanlarının məsələyə operativ yanaşdığına görə təşəkkür edib və hadisənin tezliklə həll olunacağına ümid etdiyini vurğulayıb.

Qeyd edək ki, son vaxtlar məşhurların adından istifadə edərək dələduzluq hallarına tez-tez rast gəlinir. Naməlum şəxslər tanış nömrələrdən istifadə edərək məşhurları və onların ətrafını hədəfə alır, bu yolla pul əldə etməyə çalışırlar.