Prodüser Təranə Səmədovanın Həbsinə Yenidən Baxılacaq
Prodüser Təranə Səmədova və tanışı Rasim Həsənov barəsində çıxarılan hökmlə bağlı Ali Məhkəməyə kassasiya şikayəti verilib. Məhkəmə iclasının tarixi dekabrın 4-ə təyin olunub. Cütlüyə qarşı irəli sürülən ittihamlar arasında hədə-qorxu ilə pul tələb etmə yer alır.
AsimanFərzəliyeva 
Bakıda hədə-qorxu yolu ilə pul tələb etmə cinayətində təqsirli bilinən prodüser Təranə Səmədova və onun tanışı Rasim Həsənov barəsində yeni hüquqi proses başlayır. Onların əvvəlki məhkəmə qərarına qarşı verdikləri kassasiya şikayəti dekabrın 4-də Ali Məhkəmədə araşdırılacaq.
Xatırladaq ki, Bakı Ağır Cinayətlər Məhkəməsinin hökmü ilə Təranə Səmədova 6 il, Rasim Həsənov isə 7 il müddətinə azadlıqdan məhrum edilmişdi. Bakı Apellyasiya Məhkəməsi də onların şikayətini təmin etməmişdi.
İttihama görə, T.Səmədova və R.Həsənov birgə Altay Səfirovun fotoşəkillərini əldə edərək, onu sosial şəbəkələrdə paylaşmaqla və ailəsinə göstərməklə hədələyiblər. Bu yolla ondan müxtəlif məbləğlərdə pul tələb edərək bir neçə dəfə ödəniş alıblar.
Tərəflər Cinayət Məcəlləsinin 182.2.1-ci maddəsi (hədə-qorxu ilə pul tələb etmə, bir qrup şəxs tərəfindən törədildikdə) ilə ittiham olunurlar. Hazırda kassasiya şikayəti əsasında işə yenidən baxılacaq.
