Taylor Svift XXI əsrin ən yaxşı müğənnisi seçildi-VİDEO

Məşhur "Billboard" musiqi jurnalı XXI əsrin ən yaxşı ifaçılarının siyahısını açıqlayıb. Bu siyahı 2000-ci ildən bəri "Billboard 200" və "Billboard Hot 100" hit-paradlarının göstəricilərinə əsasən tərtib edilib.

Analiz nəticələrinə görə, XXI əsrin ən yaxşı müğənnisi amerikalı pop ulduz Teylor Svift seçilib. Sviftin musiqi karyerası 2006-cı ildən etibarən sürətli inkişaf edib və o, bu müddət ərzində 14 dəfə "Billboard 200"də, 12 dəfə isə "Billboard Hot 100"də birinci pilləyə yüksəlib.

O, 2022-ci ildə "Midnights" albomundakı bütün mahnıları ilə eyni anda hit-paradın ilk 10-luğunda yer alan ilk sənətçi olub. Bu uğuru 2024-cü ilin mayında "The Tortured Poets Department" albomu ilə təkrarlayıb. Müğənninin digər nailiyyətlərindən biri 86 həftə ərzində "Billboard 200"də birinci yerdə qalmasıdır ki, bu da dünya musiqi tarixində misilsiz rekorddur.

Siyahıda ikinci yeri Kanadalı reper Dreyk tutur. Onun 2009-cu ildən bəri 78 mahnısı "Hot 100"də ilk 10-luğa daxil olub. Üçüncü pillədə isə 14 sinqlı "Hot 100"də birinci olan Rihanna qərarlaşıb.

"Billboard"a görə XXI əsrin ən yaxşı 10 müğənnisi:

1. Teylor Svift
2. Dreyk
3. Rihanna
4. Post Malone
5. Eminem
6. The Weeknd
7. Beyons
8. Castin Biber
9. Bruno Mars
10. Aşer

Qeyd edək ki, Teylor Svift həm də ən zəngin qadın müğənni kimi tanınır.