“Azərpaşa Nemətov 7 il məni səhnəyə qoymadı...”

Aktrisa Mehriban Zəki, Akademik Milli Dram Teatrının Xalq artisti, ARB TV-də yayımlanan "Pərvizə görə" verilişində uzun illər səhnədən uzaq qalmasının səbəbini açıqlayıb. O bildirib ki, mərhum Azərpaşa Nemətov tərəfindən 7 il boyunca səhnəyə çıxması qadağan edilib: "Bundan əvvəlki dövrdə 7 il müddətində "AzDrama"da səhnəyə çıxmadım. Hər bir vəziyyəti qanuni olaraq qəbul etdim. Heç vaxt bu hadisəni neqativ olaraq görmədim. Pis olan, o idi ki, 7 il mənim həyatımda itdi. Amma yəqin ki, belə lazım idi. Azər müəllim mənim Rus Dram Teatrında tamaşa oynamama görə məni cəzalandırdı. 7 il... O məni qəbul etmirdi və mənimlə tamaşa qurmaq istəmirdi. Bir söhbətimizdə dedi ki, "çıx, get Rus Dram Teatrının aktrisası ol!" Mən də ona "getməyəcəyəm" dedim. Həyat öz axarı ilə davam edir, zaman dəyişdi. Allah Azər müəllimə rəhmət etsin."

Mehriban Zəki, zamanla səhnəyə qovuşduğunu və hər dəfə səhnəyə çıxanda 7 il səhnəsiz qaldığı müddətin həsrətini yaşadığını qeyd edib: "Mehriban Ələkbərzadə gələndə ilk tamaşa üçün "Sənsiz" əmri verildi. Rejissorluğu Nihad Qulamzadə öhdəsinə götürdü. İlk dəfə Sevinc obrazını mənə təklif etdilər. Bu təklifi böyük sevinc və sevgi ilə qəbul etdim. Hər dəfə səhnəyə çıxanda o 7 il boyunca səhnəsiz qaldığım müddəti düşünürəm. O həsrət, o zamanlar... Səhnəyə qovuşmaq mənim üçün bayramdır. Tamaşaçıların da sevgisi və anşlaqı mənim üçün böyük sevincdir."