"Qırxdan Sonra..." Filminin Təqdimatı baş tutacaq

Dekabrın 24-də “Nizami” Kino Mərkəzində “Qırxdan Sonra...” adlı qısametrajlı bədii filmin təqdimatı baş tutacaq. Filmin ssenari müəllifləri Saida Haqverdiyeva və Sevda Sultanova, rejissoru isə Saida Haqverdiyeva, görüntü rejissoru isə Şahmar Səfəroğlu olub.

Filmdə baş rollarda tanınmış aktrisalardan Zümrüd Qasımova və Gülçöhrə Abdullayeva yer alır. Filmin qəhrəmanı 40 yaşını keçmiş, ailə məişət sıxıntıları ilə üzləşən bir aktrisadır. Zamanla, həm kinoda, həm də teatrda onun tələbatının azaldığını hiss edən qadın, bu dəyişikliklə barışmaqda çətinlik çəkir.

Filmin əsas ideyasından biri sənətin görünməyən tərəflərini, qadın qəhrəmanın fərqli ruh hallarını təsvir edərək izah etməkdir. Rejissor, aktyor və qadın taleyini iki qəhrəmanın yaşantıları fonunda kinematoqrafik şəkildə təqdim edir.

"RS Production"un istehsalı olan filmin prodüserləri Kəmalə Nəhmətova və Saida Haqverdiyevadır. Montaj rejissoru Əli Xiləli, ikinci operator Sahib Mikayılov, səs rejissoru Mehman Nadirov, səs operatoru isə Aslan Əlibəyovdur.

Film Mədəniyyət Nazirliyinin dəstəyi ilə nümayiş olunacaq və montaj prosesində texniki dəstəyə görə Azərbaycan Kinematoqrafçılar İttifaqına təşəkkür edilib.